Statuten


08.03.2024


AMICALE ELLENG, a.s.b.l. , association sans but lucratif
Veräinssëtz: 26, Ierpeldéngerstrooss, L-5690 Elleng
F3851

STATUTEN
Kapitel I. Numm, Zweck, Sëtz an Dauer
Art. 1. Ënnert dem Numm “AMICALE ELLENG” ass 1977 e Veräin gegrënnt ginn, deen 1990 duerch eng Statutenännerung zu enger ASBL ginn ass an deen vun do un den Numm “AMICALE ELLENG, a.s.b.l.” dréit.
Art. 2. D’AMICALE ELLENG, a.s.b.l., setzt sech fir den Interessi vun der Uertschaft Elleng a sengen Awunner an, an ass duerfir op follgenden dräi Pläng aktiv:
- vertrieden vun de lokalen Gemeinschaftsinteressen vun Elleng a vu sengen Awunner vis-à-vis vun den Stats- a Gemengenautoritéiten oder aner Institutiounen an Administratiounen,
- ënnerhuelen an ënnerstëtzen vun Initiativen, déi d’Duerf Elleng op strukturellem, kulturellem an touristeschem Plang weiderentwéckelen an den Duerfcharakter erhalen hëllefen,
- fërderen vum Gemeinschaftsliewen an d’Integratioun vun neien Awunner vun Elleng an d’Duerfliewen.
Art. 3. De Sëtz vun der AMICALE ELLENG, a.s.b.l. zu Elleng am Centre Martialis, Ierpeldéngerstrooss
(L-5690). De Sëtz vun der AMICALE ELLENG, a.s.b.l. kann ouni Statutenännerung op eng aner Plaz am Duerf verluecht ginn.
Art. 4. De Veräin ass fir eng onbegrenzten Zuel vu Joren gegrënnt ginn.
Art. 5. De Veräin ass politesch, ideologesch a reliéis neutral.
Kapitel II. Admissioun
Art. 6. D’Unzuel vun de Memberen ass no uewen op, duerf awer net manner wéi 7 sinn. All Member gëtt an d’Memberslëscht agedroen. D’Memberslëscht ass an elektronescher Form am Sëtz vun der ASBL hannerluecht.
Art. 7. De Veräin besteet aus:
 – aktive Memberen an ,
 – Éierememberen dat sinn all aner physesch a juristesch Persounen, déi de Veräin moralesch oder finanziell ënnerstëtzen. D’Éierememberen hunn an der Generalversammlung kee Stëmmrecht.
Art. 8. Wien aktive Member vum Veräin wëllt ginn mécht seng schrëftlech Demande un de Comité, deen iwwert d’Ophuele vum aktive Member decidéiert. All aktive Member ass verflicht d’Statuten un ze erkennen an säi Joresbeitrag ze bezuelen. De Mindestalter fir Member ze ginn läit bei 15 Joer.
Kapitel III. Demissioun an Ausschloss
Art. 9. Et ass een net méi Member:
- wann een säin Joresbäitrag net bezilt,
- wann een aus perséinlechen Grënn aus dem Veräin demissionéiert. Eng Demissioun ass schrëftlech un de Comité ze riichten,
- wann zwee Drëttel vun de Stëmmberechtegten an der uerdentlecher Generalversammlung decidéieren e Member wéinst schwéierem Feelverhalen oder dem net respektéieren vun de Statuten auszeschléissen,
- am Doudesfall.
Kapitel IV. Ënnerorganisatiounen vun der Amicale
Art. 10. De Veräin huet och d’Méiglechkeet fir sech Ënnerorganisatiounen ze ginn. De Comité leet dës Ënnerorganisatiounen fest. Si sinn fir speziell Alters- oder Interessekategorien vun den Awunner vun Elleng bestëmmt. Si kënnen och an de Grenzen vun dëse Statuten autonom funktionéieren, sinn a bleiwen awer ëmmer Bestanddeel vun der AMICALE ELLENG, a.s.b.l.. Si dierfen eng eegen Kees féieren. All Joer leet d’Ënnerorganistioun e Budget fest fir hir Aktivitéiten ze finanzéieren. Als Bestanddeel vum Gesamtbudget vun der AMICALE ELLENG, a.s.b.l. gëtt dëse Budget vum Comité (Conseil d’Administration) validéiert an dann der Generalversammlung zwecks Approbatioun virgeluecht. De Budget am Ufank an de Kont zum Schluss vum Joer mussen am Gläichgewiicht sinn. Sollten Ausgaben noutwenneg sinn, déi iwwert d’Recetten erausginn, mussen dës Ausgaben vum Comité vun der Amicale am Viraus approuvéiert ginn. De Responsabelen vun der Ënnerorganisatioun ass och responsabel fir d’Gestioun vun dëse Finanzen. Op den 31.12. vun all Joer leet d’Ënnerorganisatioun en detailléierten Décompte vir, deen an de Finanzrapport vun der Amicale Elleng a.s.b.l. integréiert gëtt. All Ënnerorganisatioun désignéiert een aus hirer Organisatioun deen dann zousätzlech zur maximaler Unzuel a soss awer ganz am Aklang mat dem Artikel 12 aus dëse Statuten als vollwäertege Member am Comité ass.
Kapitel V. De Comité, Fonctionnement a Kompetenzen
Art. 11. D’Aarbechtsjoer fänkt den 1.Januar un a schléisst den 31.Dezember of.
Art. 12. De Veräin gëtt vun engem Comité (Conseil d’Administration) geleet. De Comité besteet op d’mannst aus fënnef Leit a kann bis aus maximal nonzéng Comitésmembere bestoen. De Comitésmember gëtt mat der einfacher Majoritéit vun der uerdentlecher Generalversammlung fir dräi Joer gewielt. De Kandidat fir an de Comité muss groussjäreg sinn.
En austriedenden Comitésmember kann erëm an de Comité gewielt ginn. Fir d’Kontinuitéit vun der Verwaltung vum Veräin ze garantéieren, ginn dräi verschidden Austrëttsserien definéiert vun deenen all Joer eng Serie erneiert gëtt.
De Comité wielt ënnert sech e President, een oder zwee Vize-Presidenten, e Sekretär, e Keessjee an eventuell och en Sekretär-adjoint an en Keessjee-adjoint. De Vize-President vertrëtt de President wann dësen verhënnert ass.
Am Laf vum Joer kann de Comité nei Comitésmemberen koptéieren. Déi koptéiert Comitésmemberen mussen sech op der nächster uerdentlecher Generalversammlung an de Comité wiele loossen.
D’Unzuel vun den koptéierten Comitésmemberen däerf ni méi héich sinn wéi e Fënneftel vun de gewielten Comitésmemberen. D’Koptioun geschitt duerch einfach Majoritéit am Comité.
Art. 13. De Comité huet all Rechter, déi noutwenneg sinn fir e gutt Funktionéieren vum Veräin ze garantéieren. All Recht, wat net dem Gesetz no ausschliisslech der Generalversammlung virbehalen ass, ka vum Comité an Usproch geholl ginn.
De Comité vertrëtt de Veräin op geriichtlechem an op administrativem Plang.
Art. 14. De Comité trëtt mindestens zwee Mol am Joer zesummen oder esou oft wéi dat gutt Funktionéieren vum Veräin et verlaangt. De President rifft d’Sëtzung schrëftlech oder digital/elektronesch an. D’Sëtzung muss och aberuff ginn wann d’Majoritéit vum Comité et verlaangt. All Comitésmember, deen verhënnert ass fir un enger uerdentlech aberuffener Comitéssëtzung deelzehuelen, ass verflicht sech ofzemellen. Kënnt hien dëser Verflichtung méi oft net no, kann hien vum Comité ausgeschloss ginn. D’Sëtzungen kënnen digital/elektronesch ofgehale ginn.
Art. 15. Drëtt Persounen däerfen op Invitatioun vum Comité u Sëtzungen deelhuelen, si däerfen awer bäi Decisiounen net mat ofstëmmen. De Comité kann eenzel Persounen erun zéien a Kommissiounen nennen, fir bestëmmten Aarbechten ze maachen. D’Kommissiounsmemberen schaffen ënnert der Responsabilitéit vum Comité.
Art. 16. Décisiounen am Comité ginn mat der einfacher Majoritéit vun den uwiesenden Comitésmemberen geholl. Am Fall vun Stëmmegläichheet zielt dem President oder sengem Vertrieder seng Stëmm duebel. De Comité ass stëmmberechtegt wann méi wéi d’Hallschent vun de Comitésmemberen do ass.
D’Entscheedungen vun de Comitéssëtzungen ginn an engem Sëtzungsbericht festgehalen. Déi eenzel Berichter ginn an engem Regëster agedroen. D’Berichter gi vun den uwiesenden Comitésmemberen ënnerschriwwen. D’Berichter kënne vun all Comitésmember nogekuckt ginn.
Art. 17. De President zesumme mat engem aneren Comitésmember engagéieren de Veräin mat hirer Ënnerschrëft vis-à-vis vun drëtt Persounen. An Finanzgeschäfter geet d’Ënnerschrëft vum Keessjee respektiv vu sengem Adjoint eleng duer.
Art. 18. De Comité muss der Generalversammlung all Joer en Aktivitéitsbericht an e vollstännege Keessebericht vum leschte Geschäftsjoer zur Ofstëmmung virleeën.
Art. 19. De Keessebericht muss vun mindestens zwee Keesserevisoren bestätegt ginn, dës däerfen awer net Member vum Comité mussen awer Member vun der ASBL sinn. D’Mandat vum Keesserevisor dauert ee Joer. Den austriedenden Keesserevisor kann erëm gewielt ginn.
Art. 20. De Comité huet d’Recht verschidde Punkten vum Funktionéieren vum internen Veräinsliewen duerch Reglementer ze reegelen. De Comité beschléisst dës Reglementer, léisst se awer vun der nächster uerdentlecher Generalversammlung ratifizéieren. Fir d‘Ratifizéieren zielt déi einfach Majoritéit vun der Generalversammlung. Dës Reglementer kann een op eiser Websäit https://www.elleng.lu noliesen oder einfach beim Comité ufroen.
Kapitel VI. Generalversammlung
Art. 21. D’Generalversammlung kënnt all Joer am 1. Trimester vum Kalennerjoer an enger uerdentlecher Sessioun zesummen. Si kënnt an enger ausseruerdentlecher Sessioun zesummen wann et noutwenneg ass.
Art. 22. D’Generalversammlung gëtt schrëftlech oder digital/elektroneschwéinstens aacht Deeg am Viraus aberuff. Op der Aluedung gëtt eng Propositioun vum “Ordre du Jour” gemaach. Den Detail riicht sech no deem, wat am Gesetz vun den ASBL’en virgesinn ass.
E Member kann sech duerch eng Procuratioun vun engem aneren Member an der Generalversammlung vertriede lossen. Kee Member kann méi wéi 1 aneren Member vertrieden.
D’Generalversammlung kann och an enger digital/elektronescher Form ofgehalen ginn.
Jidder Propositioun, déi op mannst vun engem Fënneftel vun den Memberen, aus der aktueller Memberslëscht, ënnerschriwwen ass, kënnt op den Ordre du Jour vun der Generalversammlung.
Art. 23. D’Entscheedungen an der Generalversammlung ginn mat der einfacher Majoritéit vun de Stëmmen geholl, et sief dann et wier vum Gesetz anescht virgesinn. D’Entscheedungen an der Generalversammlung ginn an engem Delai vun 30 Deeg op der Websäit https://www.elleng.lu publizéiert.
Art. 24. Déi uerdentlech Generalversammlung befënnt mindestens iwwert déi follgend Punkten:
 – Aktivitéits- a Keessebericht,
 – Entlaaschtung vum Comité als Gremium an och vum Keessjee eenzel,
 – d’Wal vun de Membere vum Comité,
 – d’Wal vun de Keesserevisoren,
 – Budget an Aktivitéitsprogramm fir dat nächst Joer,
 – Festleeën vum Joresbäitrag deen awer net däerf méi héich wéi 50€ sinn.
Art. 25. Déi ausseruerdentlech Generalversammlung befënnt iwwert:
 – D’Ännerung vun de Statuten no den Modalitéiten wéi se am Gesetz iwwert d’ASBL’en virgesi sinn,
 – d’Opléise vum Veräin mat der zwee Drëttel Majoritéit vun allen aktiven Memberen.
Kapitel VII. Schlussbestëmmungen
Art. 26. Wann de Veräin opgeléist gëtt, da gëtt d’Verméigen blockéiert. Sollt bannen fënnef Joer en neie Veräin mat deem selwechten Zweck zu Elleng gegrënnt ginn, iwwerhëlt dëse Veräin déi Konten. Am anere Fall verfält dem gemeinsamen “office social” vun de Gemengen Munneref an Duelem d‘Verméigen, nodeems all Scholden bezuelt sinn. Dat esou blockéiert Verméigen kann nëmmen mat der Ënnerschrëft vum Buergermeeschter vun der Gemeng Munneref a sengem éischte Schäffen fräi gemaacht ginn.
Art. 27. Fir alles wat net an dëse Statuten virgesinn ass, gëllt d’Gesetz iwwert d’Asbl’en.
Art. 28. Dës Ausgab vun den Statuten ersetzt all vireg Versiounen an ass eleng valabel.


Esou entscheed, den 8. Mäerz 2024 zou Elleng am Veräinssëtz, Centre Martialis, Ierpeldéngerstrooss
duerch eng ausseruerdentlech Generalversammlung.
Ënnerschrëften: Raymond Goedert, Anne Faber, Marc Bichler, Jill Hoenen, Magalie Lysiak, Gérard
Bichler, Jessica Sirres, Elodie Formica, Leo Schaus, Neckel Reuland, Nadine Esch, Marc Beneké,
Weber Viviane, Siebenaler Lydie, Tun Coelho, Alain Al Hindy duerch Prokuratioun Raymond Goedert.